بقلم/ نور جمال
هيفاء وهبي والطبيب والـ٥ مليون.. دخلت عيادة بس، وطلعت فيديو بيتعرض من غير اذنها على تيك توك وفيسبوك وإنستغرام.محكمة القاهرة الاقتصادية قررت أمس الاثنين إحالة دعوى التعويض المقامة من الفنانة هيفاء وهبي ضد طبيب شهير إلى خبراء الملكية الفكرية بالمحكمة، وحددت جلسة ١٣ يوليو المقبل للمثول أمام الخبير المختص.
بدايه الازمه ..
القصة بدأت في أبريل ٢٠٢٣، لما هيفاء زارت مركز طبي للحصول على استشارة. خلال الزيارة، اتعمل مقطعين مصورين قصيرين لدعم المركز، واضح إنه اتعمل لأغراض ترويجية محددة ولمرة واحدة. المشكلة إن الطبيب بعدها نشر الفيديوهين بشكل متكرر على منصاته الشخصية والتجارية فيسبوك وإنستغرام وتيك توك من غير أي اتفاق قانوني يجيز إعادة النشر، ومن غير موافقة هيفاء.
الأدهى إن ده اتعمل في إطار دعاية تجارية واضحة لجذب عملاء جدد.محامي هيفاء المستشار شريف حافظ قدم حوافظ مستندات كاملة، وطالب بندب خبير ملكية فكرية لفحص الفيديو الممول وتحديد الأضرار. هيفاء بتطالب بـ٥ مليون جنيه تعويض عن الأضرار المادية والمعنوية.
والمثير إنها حاولت تحل الموضوع بالودي أكتر من مرة عبر مدير أعمالها، لكن الطبيب ما استجابش.القضية دي مش بس قضية هيفاء دي سابقة قانونية مهمة في عالم حقوق الصورة الرقمية في مصر. أي فنان أو شخصية عامة بتزور مكان، سواء عيادة أو محل أو مطعم، والمكان ده بينشر صورها أو فيديوهاتها على السوشيال ميديا من غير عقد، ده استغلال تجاري غير مشروع. الشاشة الصغيرة اللي في إيدك دلوقتي، صورتها عليها تساوي فلوس وحكم يوليو القادم هيقول بالظبط كام.
