بقلم/ منى فارس
انتهت أخيرًا القضية اللي شغلت الناس فترة طويلة، بعد إن النجمة بليك ليفلي والمخرج جاستن بالدوني اتفقوا على تسوية ودية بينهم، وده قبل ما تنعقد جلسة المحكمة المقررة في 18 مايو الجاري بأيام بس.
القصة من الأول
الموضوع بدأ في ديسمبر 2024، لما بليك ليفلي رفعت دعوى قضائية على جاستن بالدوني، اللي اشتغلوا مع بعض في فيلم It Ends With Us، واتهمته إنه سبب ليها “ضيق نفسي شديد”، وإنها تعرضت لسلوك غير لائق بعد ما اعترضت على بيئة العمل داخل موقع التصوير. كمان اتكلمت عن إنها تعرضت لـ”انتقام” منه امتد لفترة التسويق للفيلم.
بالدوني من جهته أنكر كل الاتهامات دي، ورفع دعوى مضادة على ليفلي وجوزها رايان رينولدز، لكن المحكمة رفضتها. كمان كانت الدعوى بتتضمن اتهام بالتحرش الجنسي، وده كمان اتلغى من قاضي فيدرالي في كاليفورنيا في أبريل الماضي.
البيان المشترك
الطرفان أصدروا بيانًا مشتركًا نشره موقع Deadline، أكدوا فيه إن فيلم It Ends With Us مصدر فخر للكل، وإنه بيسلط الضوء على قضية مهمة زي العنف الأسري ودعم الناجيات.
وجاء في البيان كمان إن “المخاوف اللي أثارتها ليفلي تستحق إنها تتسمع”، مع تأكيد الجانبين على ضرورة توفير بيئات عمل آمنة، معربين عن أملهم إن التسوية دي هتساعد الجميع على المضي قُدُمًا.
اللافت للنظر إن ليفلي كانت أعلنت في أبريل الماضي إنها عازمة على الاستمرار في القضية، ونشرت ده عبر Story على إنستغرام، قبل ما تعدل عن قرارها وتتراضى مع بالدوني في النهاية.
