فيلم مايكل جاكسن بين الإبهار والخيبة

لما بتشوف فيلم بيتكلم عن مايكل جاكسون، قلبك بيبقى معاه من أول لحظة. الرجل ده مش مجرد نجم، ده ظاهرة. وطبعاً التوقعات بتبقى في السما

الجزء اللي بيتكلم عن أيام The Jackson 5 كان الأحلى في الفيلم. شفنا الطفل الموهوب، الضغوط، الانضباط، وإزاي اتشكّلت شخصيته من صغره. مشاهد مؤثرة ومحرّكة للمشاعر.

المشكلة إن الفيلم ما اتعمّقش في الجزء الأهم، إزاي مايكل كان بيصنع الموسيقى! اللقطات اللي جوّا الاستوديو مع كوينسي جونز كانت قليلة وسريعة، وكأنك بتتفرج على لحظة سحرية من بعيد من غير ما تحس بيها.

ألبوم Thriller مش بس ألبوم، ده حدث غيّر البوب كله! بس الفيلم اكتفى بلمحات سطحية عن إنتاجه من غير ما يوضّح إزاي اتكتبت الأغاني، ومين اشتغل فيها، وإيه التجارب اللي خلّته يبقى تحفة خالدة.

محدش طالب فيلم وثائقي ممل، بس الجمهور كان عايز يفهم أكتر، إزاي جاكسون كان بيفكر وبيبدع. ده اللي كان ممكن يخلي الفيلم استثنائي زي صاحبه، وده بالظبط اللي افتقدناه.