بقلم/ منى فارس
“النجمة الكبيرة ميريل ستريب مش بتمسك لسانها، وفي أحدث تصريحاتها انتقدت بشدة أفلام عالم مارفل، وقالت صراحةً إن الإفراط في هذا النوع من الأفلام “خلّى السينما مملة”
جت التصريحات منين؟
الكلام ده جه خلال مقابلة ترويجية لفيلم The Devil Wears Prada 2، اللي بتتجمع فيه ستريب مع آن هاثاواي وإميلي بلانت، وهناك قالت بوضوح إن صناعة السينما بقت تميل لما وصفته بـ “المَرْفَلَة”، يعني تبسيط القصص وتفريغ الشخصيات من عمقها.
وإيه اللي بيضايقها بالظبط؟
ستريب شايفة إن أفلام الأبطال الخارقين بتعتمد على فكرة مبسطة جداً: واحد كويس وواحد وحش، وخلاص. بينما الحياة الحقيقية مش كده خالص، وأضافت إنها بتفضل الشخصيات اللي عندها عيوب، والبطل مش لازم يكون مثالي، والشرير ممكن يكون عنده جانب إنساني، ده اللي بيخلي القصة مثيرة ومقنعة.
وليه رجعت لـ Devil Wears Prada؟
قالت إن الجزء الجديد بيقدم نظرة أعمق على التغييرات اللي حصلت في عالم الموضة والإعلام خلال العشرين سنة الفاتت، وده اللي شدّها للدور تاني.
وموضوع الذكاء الاصطناعي؟
المقابلة اتطرقت كمان للـ AI، وهنا ستريب مزحت وقالت إن شخصية “ميرندا بريستلي” مش محتاجاه لأن عندها مساعدين بيعملوا كل حاجة عنها! أما آن هاثاواي فكشفت إنها لاحظت إن ناس بتقدم على وظايف بتستخدم ChatGPT في كتابة رسائل الشكر، وقالت إن الموضوع “مضحك وواضح جداً”.ستريب من جهتها وصفت الاعتماد الزيادة على الذكاء الاصطناعي بأنه “مؤسف”، وطالبت الشباب، وخصوصاً البنات، إنهم يحافظوا على صوتهم الإنساني ومايسيبوش التكنولوجيا تتحكم في هويتهم.
