بقلم/ منى فارس
“عاد الثنائي الإخراجي مات بيتينيلي-أولبين و تايلر جيليت لإخراج الجزء الثاني من فيلم الرعب الشهير، اللي اتسمى “Ready or Not 2: Here I Come”، والفيلم دلوقتي في دور العرض المصرية وبيحقق إيرادات قاربت الـ 40 مليون دولار.
مش مجرد تكرار للأول
الثنائي اتكلم صراحة وقالوا إنهم مش عايزين يعيدوا نفس الوصفة اللي نجحت في الجزء الأول، لكن الهدف كان أكبر من كده:
“سعينا لتوسيع العالم بشكل غير متوقع، ودفع شخصية جريس لأماكن أكثر خطورة وتعقيدًا”
وأكدوا إن الجزء الجديد هيفضل محافظ على اللمسة اللي حبّها الجمهور، يعني التوليفة الجامدة بين الرعب الدموي والكوميديا السوداء، بس مع رفع درجة الجنون لمستوى تاني خالص:
“رفعنا سقف كل شيء — المخاطر، الجنون، وحتى روح الدعابة السوداء”
القصة فيها إيه الجديد؟
الأحداث بتبدأ من اللحظة اللي خلص فيها الجزء الأول، لكن المرة دي جريس مش لوحدها، هتلاقي نفسها جنب شقيقتها المنفصلة “فايث” ، واللي بتجسد دورها كاثرين نيوتن، وكمان سامارا ويفينج بترجع في دور جريس.
التحدي الجديد؟ مش عيلة واحدة بس زي ما كان في الجزء الأول، الفيلم بيحط البطلتين في مواجهة أربع عائلات بتطاردهم في نفس الوقت، وكلهم بيتنافسوا على السيطرة على مجلس قوي بيتحكم في العالم كله.
الدم والمرح مع بعض
سامارا ويفينج نفسها اتكلمت عن أسلوب الفيلم بطريقة بتخلي الواحد يتشوق:
“كل ما نفتكر إننا وصلنا للحد الأقصى، الفريق بيفاجئنا بفكرة أكثر جنونًا ودموية — الهدف مش الصدمة بس، لكن تقديم تجربة بتمزج الرعب بالمرح بطريقة مبتكرة”
كاست ضخم
الفيلم فيه قائمة نجوم مثيرة للاهتمام، منهم سارة ميشيل جيلر، إيليجا وود، كيفين دوراند، نيستور كاربونيل، وكمان المخرج الأسطوري ديفيد كروننبرغ في دور تمثيلي.
الفيلم من تأليف جاي بوسيك و ر. كريستوفر ميرفي ، وتوزيع Fox Searchlight Pictures عن طريق United Motion Picture في مصر.
