بقلم/ نور جمال
أعلن إن رانفير سينج هيخلف شاه روخ خان في Don 3 واحد من أضخم فرانشايزات بوليوود. الجمهور طار فرحاً، السوشيال ميديا اشتعلت، والإعلان وصل ملايين المشاهدات في ساعات. رانفير نفسه رسّم المشهد وقال بالنص: “مافيش حد يقدر يمسكني، أنا الدون.”المشكلة إن الكلام ده اتقال وانتهى عند الكلام.سنة ورا سنة، مافيش سكريبت جاهز، مافيش تصوير، مافيش حاجة.
رانفير بقى يشتغل على Dhurandhar وDhurandhar 2 اللي كسروا تذاكر وعملوا أكتر من ٣١٠٠ كرور روبية إجمالاً وDon 3 فضل معلقاً في الهوا. في ديسمبر ٢٠٢٥، انفجر الخبر: رانفير سينج خرج من Don 3، بكل هدوء، من غير إعلانات، ومن غير حتى مكالمة حلوة.رانفير قال إن فرحان ما كانش عنده سكريبت متكامل، وإنه كممثل مش بيشتغل إلا مع مادة إبداعية جاهزة ومحترمة.
فرحان قال العكس إن رانفير طلع من المشروع بعد ثلاث سنين من التحضيرات، وعلى بعد ثلاث أسابيع بس من بداية التصوير في الخارج، وخلّف ورا خسائر بتتكلم عن نفسها: ٤٥ كرور روبية راحوا على الهوا من مصروفات ما قبل التصوير.فرحان راح لـ FWICE اتحاد موظفين السينما في غرب الهند وقدم شكوى رسمية. الاتحاد عقد جلسات استماع، دعا رانفير ثلاث مرات، والأخير ماجاش ومارد. النتيجة؟ في ٢٦ مايو ٢٠٢٦، أصدروا قرار “عدم التعاون” يعني بالعربي الفصيح: رانفير سينج ممنوع من التعامل مع أي عضو في الاتحاد لحد ما يحضر شخصياً ويفهمهم.الطرافة في الأمر إن رانفير في نفس الفترة دي كان لسه بيجمع أرقام قياسية على شباك التذاكر بـ Dhurandhar. يعني من ناحية هو أنجح ممثل في بوليوود دلوقتي، ومن ناحية تانية هو ممنوع من أكبر اتحاد في الصناعة. والناس على السوشيال ميديا بتسأل: مين الأذكى في القصة دي اللي خرج من فيلم مفيهوش سكريبت، ولا اللي انتظر ثلاث سنين وهو مفيش سكريبت؟
