بقلم/ منى فارس
الممثلة إيفانجلين ليلي، المعروفة بدورها في أفلام Ant-Man و Avengers: Endgame ، خرجت بانتقادات حادة جداً لشركة ديزني بعد موجة تسريحات طالت موظفين في مارفل ستوديوز .
إيه اللي حصل؟
ديزني سرّحت حوالي ألف موظف من قطاعات مختلفة، من بينهم 15 موظف في مارفل، معظمهم من فريق التطوير البصري، اللي هم الناس المسؤولين عن كل التصميمات والمؤثرات البصرية اللي شايفينها في أفلام المارفل.
ليه ليلي اتكلمت تحديداً؟
اللي حرّك ليلي إن من بين المسرّحين صديقها الشخصي آندي بارك، مدير التطوير البصري في مارفل، اللي قضى 16 سنة من حياته في الشركة وساهم في تصميم أيقونيك كتير في عالم مارفل السينمائي.
ليلي اتصلت بيه مباشرة تتأكد، وبعد ما أكدلها الخبر، مقدرتش تسكت.
إيه اللي قالته؟
وصفت القرار بإنه “صادم”، وقالت صراحة إن ديزني “بتدير ظهرها للناس اللي بنوا قوتها”.وكمان أثارت تساؤل مهم جداً..
هل الفنانين دول هيتم استبدالهم بـ الذكاء الاصطناعي؟
ومين هيحمي حقوقهم لو استخدموا أعمالهم في تدريب الـ AI من غير إذنهم؟ودعت المشرّعين في كاليفورنيا للتدخل ووضع قوانين تحمي الإبداع البشري من الاستغلال.
إيه الموقف الرسمي؟
مارفل لم تؤكد ولم تنفِ موضوع الذكاء الاصطناعي، لكن المبرر الرسمي للتسريحات هو تغيير في الاستراتيجية الإنتاجية، حيث قررت الشركة تقليل عدد أعمالها السنوية بعد سنوات من الإنتاج المكثف، في محاولة لتجنب إرهاق الجمهور والحفاظ على الجودة.
