بقلم/ منى فارس
مفاجأة ما حدش توقعها، أوكا قرر يمسح كل صوره ومنشوراته من الإنستجرام، وسيب الحساب فاضي تماماً، غير أغنية واحدة بس.. “أوكا بيحارب الملل”.
الخطوة دي مش مجرد حركة ترويجية عادية، لأ، دي بتحس إنها إعلان رسمي عن إن مرحلة اتقفلت وجاية مرحلة تانية خالص.
بيانه.. كلام واضح ومباشر
أوكا ماسكش نفسه وقال اللي عنده بصراحة في بيان رسمي:
“أغلب الأعمال المتداولة بقت تدور في نفس الإطار، سواء في الأفكار أو شكل الموسيقى، وعدد قليل من الفنانين عندهم الجرأة إنهم يقدموا حاجة مختلفة
“وضرب بالكلام كمان على اللي بيقلدوا الموسيقى الأجنبية علشان “يبانوا عالميين”، وقال إن التطوير الحقيقي بيبدأ من البصمة المحلية، مش من النسخ والتقليد.
“المقلوب”.. اللون الجديد
الجديد إن أوكا كاشف إنه شغال دلوقتي على لون موسيقي جديد جوه المهرجانات اسمه “المقلوب”، في محاولة يكسر بيها الشكل التقليدي اللي الناس اتعودت عليه.
الأغنية نفسها.. مختلفة فعلاً
كليب “أوكا بيحارب الملل” جاء بهوية بصرية غير تقليدية خالص، أجواء سينمائية وإخراج أقرب للمستوى العالمي، بعيد عن الاعتماد على الإيقاع والكلمات بس زي ما احنا متعودين في المهرجانات.
وده جاي بعد النجاح اللي حققه ألبوم “هاكونا مطاطا” اللي كان هو كمان خطوة مختلفة في مسيرته.
السؤال اللي الكل بيسأله دلوقتي.. هل أوكا هيعدي فعلاً؟
