بقلم/ نور جمال
إيه اللي بيخلي رجل واحد يحكم على وجدان أمة بأكملها لأكتر من ستين سنة؟ وإيه اللي بيخليك تحس إن عادل إمام بيتكلم عنك أنت بالذات؟
من فين جاء الزعيم؟
وُلِد عادل محمد إمام في 17 مايو 1940 لأسرة فلاحية فقيرة في حي السيدة عائشة بالقاهرة، لكن أصول عائلته من قرية شها مركز المنصورة بمحافظة الدقهلية يعني مش فيلا ولا نجومية موروثة ده ابن الحارة الشعبية اللي اتربى في الزحمة والبساطة، وانتقل مع عيلته من حي لحي وسط القاهرة القديمة. كان والده يعمل “شاويش” في الشرطة، وأمه اللي أحبها جداً كانت ست البيت.
والده محمد إمام كان متديناً، وكان قد عانى في آخر حياته من مرض ألزهايمر، وتوفي عام 1997. نفس المرض اللي جسّده عادل إمام بعدين في فيلم “زهايمر” بإتقان وجع. يمكن لأنه شافه بعينيه.
جذور فنيه في العيله
له ثلاثة أشقاء: شقيق واحد هو المنتج عصام إمام، وشقيقتان هما منى وإيمان المتزوجة من الفنان الراحل مصطفى متولي. يعني الفن كان موجود في الجيل حواليه من قبل ما يبقى نجماً.
مهندس زراعي وَلَع المسرح بقلبه
نال عادل إمام درجة البكالوريوس في الزراعة من جامعة القاهرة، وكان قد بدأ حياته الفنية على مسرح الجامعة، ومنها انطلق إلى عالم السينما. ده مش مجرد “اتخرج من كلية حلوة” ده واحد درس علم وبُص لقا نفسه غلط، وبدل ما يروح يزرع أرض، راح يزرع في عقول الناس لستين سنة.
البدايه الفنيه و الاستمرارية
بدأ أول أعماله المسرحية عام 1963 في مسرحية “أنا وهو وهي”، ثم مسرحية “النصابين” عام 1966، وبعدها مسرحية “مدرسة المشاغبين” 1971 اللي استمر عرضها خمس سنوات متواصلة.
في السينما ظهرت موهبته الحقيقية خلال مشاركته أحمد مظهر بطولة فيلم “لصوص لكن ظرفاء” 1968، لكن مرحلة ما بعد النكسة 1967-1972 عطّلته قليلاً وكان يشغل الأدوار الثانية، إلى أن جاء دوره الحاسم في فيلم “البحث عن فضيحة” عام 1973.
ودّع الأدوار المساعدة وبدأت مرحلة النجومية المطلقة، وساعد على ذلك انتصار أكتوبر في نفس العام وحالة الانتعاش النفسي للمخرجين والكتاب. يعني حتى توقيته كان مضبوط لحق بانتصار أكتوبر وأحلام الناس، وأصبح وشهم على الشاشة.
ليه هو مثقف مش بس ممثل كوميدي؟
مزج عادل إمام خلال مسيرته بين الفكاهة والحزن ليجسّد الأشخاص العاديين وضحايا الظلم والفقر، وأُطلق عليه لقب تشارلي تشابلن المصريين المعاصر.
مع بداية تسعينيات القرن العشرين أخذت أفلامه الصبغة السياسية الاجتماعية التي تعكس اهتمامات رجل الشارع العادي بشكل كوميدي، وشكّل فريق عمل ناجح جداً مع السيناريست وحيد حامد والمخرج شريف عرفة.
ده مش ممثل بيحفظ نص ده واحد فاهم الناس أكتر من الناس نفسها. الإرهابي، المصير، عمارة يعقوبيان دي مش أفلام، دي وثائق اجتماعية لبست جلباب الكوميديا عشان تعدي الرقيب وتوصل لقلوب الناس.
أهم أعماله: من المسرح للتاريخ
قدّم عادل إمام لغاية الآن 126 فيلماً و16 مسلسلاً و11 مسرحية.
من أبرز ما قدّمه:
مدرسة المشاغبين المسرحية اللي الناس لسه بتحفظها جملة جملة.
الإرهابي 1994 حصل عنه عام 1995 على جائزة أفضل ممثل مقدمة من مهرجان القاهرة السينمائي.
عمارة يعقوبيان 2006 حصل عنه كمان جائزة أفضل ممثل عام 2007 من مهرجان القاهرة السينمائي. زهايمر 2010 الفيلم الأصعب عاطفياً بعد رحيل والده بنفس المرض.
بعد انقطاع 32 عاماً عن الدراما التليفزيونية، عاد بثمانية أعمال تليفزيونية في رمضان ثمانية أعوام متتالية من 2012 لـ2019، بدءاً من “فرقة ناجي عطا الله” وحتى “فالنتينو”.
الزعيم في 86: بخير ومعتزل
يُعدّ آخر أعمال الزعيم مسلسل “فلانتينو” من تأليف أيمن بهجت قمر وإخراج نجله رامي إمام.
دخل الزعيم في مرحلة غياب فني واعلامي اختياري منذ ما يقرب من خمسة أعوام، قرر خلالها منح نفسه قسطاً من الراحة بعد مسيرة حافلة استمرت أكتر من ستة عقود، ويستمتع بقراءة الكتب ومتابعة الأحداث والجلوس مع أحفاده الذين يمثلون له السعادة الحقيقية.
أكد الدكتور أشرف زكي أن الزعيم يتمتع بصحة جيدة ويعيش وسط أحفاده وأولاده بكل حب، وطالب الجميع بعدم نشر الصور المزيفة والشائعات حفاظاً على الأسرة.
أعلنت الفنانة إسعاد يونس رسمياً أنه اعتزل الفن ولن يشارك في أعمال جديدة أو يطلّ في لقاءات إعلامية، بعد مسيرة حافلة تركت بصمة كبيرة في السينما والمسرح.
الزعيم مش محتاج حاجة تانية. قدّم أكتر من اللي لو قسّمناه على مئة ممثل هيبقوا كتير. وفي النهاية، الناس اللي بتدور عليه على جوجل كل يوم، هي نفسها دليل إنه مش غايب هو موجود في كل ميم، في كل جملة، في كل صورة محفورة في الذاكرة الجماعية للمصريين و من المحيط للخليج كل سنه و الزعيم بخير.
