بقلم/ منى فارس
مش كتير من النجوم بيعرفوا يوازنوا بين الشهرة والخصوصية، لكن دانييلا رحمة اختارت طريقها بوضوح، ونشرت مجموعة صور جديدة مع ابنها “إلياس” على إنستغرام، فاقت في تفاعلها أي ظهور رسمي أو فوتوشوت مدفوع.
الصور.. بسيطة وبتقول كتير
مفيش استوديو ولا إضاءة احترافية، دانييلا ظهرت بشكل طبيعي خالص، مرة بتحمل إلياس في حاملة أطفال وعليها إطلالة بيضاء ناعمة، ومرة تانية مستلقية على الأرض جنبه وسط العبه الصغيرة، وفي صورة تانية بكنزة بيضاء سميكة وجينز كلاسيكي، وكأنها بتقول للجمهور: “ده أنا من غير فلتر.”
ورفقت الصور بتعليق إنجليزي قصير بس معبّر:”A little chaos, a little sparkle” والناس فهمت الكلام، لأن ده بالظبط اللي بيحس بيه أي حد دخل عالم الأمومة.
إلياس.. والاسم اللي بيحمل قصة
الاسم مش اختيار عشوائي، ناصيف زيتون اختار “إلياس” تكريماً لوالده الراحل اللي كان بيحمل نفس الاسم، وده اللي خلى الجمهور يتعلق بالطفل حتى قبل ما يشوفه.
الثنائي كان حريص طول فترة الحمل والولادة إنه يحافظ على خصوصيته، وشارك لقطات محدودة جداً، وده بالظبط اللي خلى الظهور الأخير يلاقي كل التفاعل ده.
الجمهور قال إيه؟
التعليقات انهالت، مش بس إعجاب بالصور، لكن تقدير حقيقي للطريقة اللي دانييلا وناصيف بيشاركوا بيها حياتهم، من غير استعراض أو مبالغة. وكتير من المتابعين وجّهوا رسائل حب لإلياس ودعوات بالصحة والسعادة.لحظات زي دي بتفضل في الذاكرة أكتر من أي ظهور على السجادة الحمرا.
