بقلم/ جاسيكا عزت
للمرة الأولى في تاريخ كأس العالم الممتد لأكتر من 90 سنة، هيبقى فيه عرض موسيقي في نص الفاينال. مش بس عرض عادي، ده حفلة بتجمع تلات أسماء من أضخم أسماء الموسيقى في العالم على مسرح واحد: مادونا، وشاكيرا، وفرقة BTS الكورية. الإعلان طلع رسمياً من الـ FIFA يوم 14 مايو 2026، وفي ثواني كان التريند بيشتعل على كل منصات التواصل الاجتماعي.
اللي بيخلي الموضوع أضخم من مجرد حفلة إن الـ Half-Time Show هيتعمل يوم 19 يوليو 2026 في ستاد MetLife بنيوجيرسي، وهو نفس الستاد اللي هيشهد نهائي البطولة. بس اللي بيميز العرض ده إنه مش بس للترفيه، ده جزء من حملة إنسانية ضخمة. الـ FIFA اتعاونت مع منظمة Global Citizen لإطلاق صندوق تعليمي اسمه “FIFA Global Citizen Education Fund”، هدفه يجمع 100 مليون دولار لتوفير تعليم وكرة قدم لأطفال حول العالم. والأروع إن دولار واحد من كل تذكرة بتتباع في أي مباراة في البطولة كلها بتتبرع تلقائياً للصندوق ده. لحد دلوقتي اتجمع أكتر من 30 مليون دولار.
العرض مش بس تجميع لنجوم في مكان واحد، ده بيتنظم بإيد واحدة. المغني كريس مارتن من فرقة Coldplay هو اللي بيشرف على تنظيم العرض كله. وبالمناسبة، Coldplay مش غرب على الموضوع ده، مارتن عمل نفس الشيء في الـ Half-Time Show بتاع نهائي Club World Cup السنة اللي فاتت. والظريف إن إعلان الأسماء اتعمل في فيديو كوميدي بيظهر فيه مارتن مع شخصيات Sesame Street والـ Muppets، وبيختاروا الأسماء مع بعض.
ليه مادونا وشاكيرا بالتحديد؟
الاختيار مش عشوائي خالص. مادونا كانت نجمة الـ Half-Time Show في الـ Super Bowl سنة 2012، يعني دي مش أول مرة تقف في عرض من النوع ده. وفي نفس الوقت، هي بتستعد لإطلاق ألبومها الجديد “Confessions II” في 3 يوليو 2026، يعني حفلة كأس العالم هتكون أقوى لحظة ترويج ممكنة للألبوم.
أما شاكيرا، فعلاقتها بكأس العالم قديمة وعميقة. غنت “Waka Waka” في نهائي كأس العالم 2010 بجنوب أفريقيا وبقت من أيقونيات التاريخ. وبالتزامن مع الإعلان، FIFA أعلنت إن شاكيرا هتطلق الأغنية الرسمية لكأس العالم 2026 اللي اسمها “Dai Dai” في نفس اليوم. كمان هي في نص جولة مسرحية عالمية دلوقتي “Las Mujeres Ya No Lloran World Tour”، وعندها حفلتين في نيوجيرسي ونيويورك في 14 و20 يوليو، يعني الفاينال في 19 يوليو بيقع حرفياً بين حفلتيها.
BTS.. العودة الرسمية للعرش
أضخم تفصيلة في القصة دي هي BTS. الفرقة الكورية كانت في غياب طويل بسبب الخدمة العسكرية لكل الأعضاء، وعادت رسمياً في مارس 2026 بألبومها السادس “ARIRANG”. ومشاركتها في نهائي كأس العالم رسالة واضحة إن الفرقة رجعت بأكبر من أي وقت فات. والجدير بالذكر إن عضو الفرقة Jungkook كان غنى في حفل افتتاح كأس العالم 2022 في قطر، بس دي المرة الأولى اللي الفرقة كلها تشارك في الحدث.
لحظة فارقة في تاريخ كأس العالم
السؤال اللي بيطرح نفسه: إيه اللي هيتغير في قواعد المباراة؟ قانون كرة القدم بيقول إن استراحة النص وقتها 15 دقيقة بالظبط. بس الـ Half-Time Show محتاج وقت أكتر بكتير، زي ما بيحصل في الـ Super Bowl. الـ FIFA لسه معلناش رسمياً هيمدوا الاستراحة ولا لأ، وده في حد نفسه تفصيلة مهمة هتتحدد قريباً.
في الآخر، كأس العالم 2026 مش بس بطولة كرة قدم، ده حدث عالمي كامل بكل معنى الكلمة. وعرض الـ Half-Time ده هيكون شاهد على لحظة تاريخية جمعت أكبر رياضة في العالم بأكبر نجوم الموسيقى.
