بقلم/ جاسيكا عزت
علامة SKIMS، إمبراطورية الملابس الداخلية اللي بَنِتها كيم كارداشيان من الصفر وحوّلتها لبراند بمليارات الدولارات، وجدت نفسها في قلب فضيحة قانونية جديدة بعد ما موظف سابق قرر يحاكمها أمام المحاكم الأمريكية.
الرجل ده اسمه David Knight، وبيدعي إنه اشتغل في SKIMS في كاليفورنيا من أكتوبر لديسمبر 2025، وإن الشركة لم تدفع له مستحقاته الكاملة طول فترة شغله.
القضية مش بس عن إن الفلوس ناقصة، لكن Knight بيوجّه أربع اتهامات صريحة للشركة:
الأول إن الموظفين اشتغلوا أكتر من 8 ساعات في اليوم وأكتر من 40 ساعة في الأسبوع، من غير ما ياخدوا أي أوفر تايم. والتاني إنهم اتحرموا من فترات الاستراحة والأكل اللي القانون الأمريكي بيضمنها لأي موظف. والتالت إن الشركة ما التزمتش بدفع الحد الأدنى للأجور عن كل ساعات العمل الفعلية. والرابع والأخطر إن الموظفين اللي سابوا الشغل أو اتطردوا ما أخدوش مستحقاتهم الكاملة.
مش بس هو ، بيطالب بدعوى جماعية ، Knight مش عايز يحكم لنفسه بس، لكنه بيطالب بتحويل القضية لـ class action، يعني يضم معاه كل الموظفين اللي عانوا من نفس الانتهاكات. وجدير بالذكر إن كيم كارداشيان شخصياً مش طرف في الدعوى، والقضية موجّهة للشركة بس.
الشركة ما سكتتش، وطلعت بردّ قوي. المتحدث باسم SKIMS قال إن الاتهامات مرفوضة تماماً، وإن القضية دي عبارة عن نموذج قانوني جاهز بتستخدمه مكاتب المحامين في كاليفورنيا للضغط على الشركات طمعاً في تسوية سريعة. وأضاف إنهم مش في وارد يدفعوا قرش واحد عن ادعاءات بلا أساس، مؤكدين التزامهم الكامل بقوانين العمل والأجور.
SKIMS مش بتواجه القضية دي بس، لكن السنة دي كانت صعبة قانونياً عليها: قبلها بفترة، هيئة تنظيمية في نيوجيرسي غرّمتها 200 ألف دولار بعد ما اتثبت إنها كانت بتخصم ضريبة مبيعات على الملابس في الولاية دي من 2019 لـ 2024، وهو حاجة محظورة قانوناً هناك.
القضية لسه في بدايتها، والمحاكم هي اللي هتحكم في الآخر، بس الضجة دي بالتأكيد مش اللي كانت كيم كارداشيان متوقعاه لبراندها اللي بنته بكل الجهد دا.
