بقلم/ منى فارس
فيلم “إذما” بيتكلم عن سؤال بسيط بس عميق جداً: إيه اللي بيحصل لما نكبر ونفقد الطفل اللي جوانا؟ ده هو جوهر الفيلم الجديد المقتبس عن رواية بنفس الاسم للكاتب محمد صادق، اللي بيخوض بيه تجربة الإخراج السينمائي لأول مرة.
إيه معنى “إذما”؟
الاسم مش اي كلام خالص، محمد صادق وضّح إن “إذما” هي اختصار لـ”إذا ما”، وبترمز لفكرة إن الإنسان مش هيوصل لأي حاجة يريدها غير لو اتخد خطوة حقيقية بنفسه. الفيلم بيقول إن الأحلام مش لازم تموت مع الكبر، وإن كل واحد فينا عنده طفل داخلي محتاج يفضل موجود.
سلمى أبو ضيف بتتعلم الباتشاتا!
سلمى بتجسد شخصية “سيرا” الكبيرة، وهي شخصية من برا بتبان قوية ومليانة طاقة، بس من جوا بتحمل ألم كتير. وعشان تأدي الدور بشكل صح، سلمى اتعلمت رقص الباتشاتا مع زميلها أحمد داوود في دروس متخصصة، وقالت إن التجربة كانت ممتعة جداً وحسستها بتحرر وطاقة إيجابية.
مين بيلعب إيه؟
الفيلم بيقدم شخصية “عيسى” في مرحلتين، حمزة دياب بيلعبه وهو صغير، وأحمد داوود بيلعبه وهو كبير. وجيسيكا حسام بتلعب سيرا الصغيرة، وهي شخصية عفوية بتعيش اللحظة من غير تخطيط كتير.الفيلم بينزل في دور العرض يوم 26 مايو.
