بقلم/ منى فارس
زمان، كان الفنان محتاج سنين عشان يوصل لناس خارج بلده، أو حتى خارج مدينته. كان لازم يعرف الشخص الصح، يتعرف على الناشر الصح، أو يحظى بفرصة معرض أو عرض في مكان مهم. النجاح كان بطيء، وكتير من المواهب الحقيقية اتقبرت من غير ما حد يشوفها.
دلوقتي الوضع اتغير بشكل جذري. أي حد عنده موهبة وهاتف بكاميرا قادر يوصل لملايين الناس في ثواني. السوشيال ميديا فتحت باب ضخم جداً للفنانين، وده شيء مش ممكن ننكره أو نقلل منه. بس السؤال اللي بيشغلني دايماً هو: إيه اللي اتغير في الفن نفسه؟
الإيجابيات.. اللي فعلاً بتفرق
أوضح حاجة السوشيال ميديا عملتها إنها كسرت احتقار الفن ، يعني خلته في متناول الكل. مش بس في الوصول للجمهور، لكن كمان في الإنتاج. دلوقتي في رسامين بيبيعوا شغلهم أونلاين لناس من دول تانية خالص، وموسيقيين بيطلعوا ألبومات من أوضتهم ووصلوا لملايين المستمعين، وممثلين اشتهروا على تيك توك قبل ما يظهروا على أي شاشة رسمية
وده في رأيي إنجاز حقيقي : الفن وصل لناس ما كانتش تعرف إنها بتحبه أصلاً.
بس في جانب تاني بيقلقني
المشكلة مش في السوشيال ميديا نفسها، المشكلة في الـalgorithm. لأن الـ algorithm مش بيكافئ الجودة دايماً، بيكافئ التفاعل والسرعة والـ trend. وده خلى كتير من الفنانين يبدأوا يفكروا بمنطق مختلف خالص، مش “إيه اللي عايز أعبر عنه؟” لكن “إيه اللي هيعمل views أكتر؟
“وأنا شايفه إن ده خطر حقيقي على الفن كفكرة. لأن الفن الحقيقي دايماً كان عن التعبير الصادق، حتى لو كان بطيء، حتى لو ما وصلش للكل. لما تبدأ تصنع فن بيناسب خوارزمية، بتبقى بتصنع محتوى مش فن
الـ Attention Economy وأثرها على الإبداع
في مفهوم اسمه “اقتصاد الانتباه”، يعني إن انتباهك كمستخدم بقى سلعة. وعشان كده المنصات بتتنافس على إنها تبقى في دماغك أكتر وقت ممكن. والفنانين اللي عايزين يبقوا ظاهرين مضطرين يلعبوا في نفس الملعب ده.
النتيجة؟ محتوى كتير وسريع وسطحي في أغلب الأحيان. الأغنية اللي بتعدي الدقيقتين الناس بتعدي عليها. اللوحة اللي تاخد وقت تفكير الناس مش واقفة قدامها، الفيلم الجميل اللي محتاج تركيز بيتشاف بسرعة على التليفون وسط ألف حاجة تانية.
بس في أمل
اللي بيريحني إن في موجة جديدة من الفنانين بدأوا يرفضوا يلعبوا باللعبة دي. ناس بتقول بصراحة “أنا مش هنشر كل يوم عشان أرضي الـ algorithm”. ناس بترجع للأسلوب البطيء في الإنتاج وتلاقي إن جمهورها أصغر لكن أكتر ولاءً وتفاعلاً حقيقياً.
وده في رأيي المستقبل الصح. مش التخلي عن السوشيال ميديا، لكن استخدامها بوعي. تنشر لما تكون عندك حاجة تقولها فعلاً، مش عشان الخوارزمية محتاجة منك تنشر
خلاصة الكلام
السوشيال ميديا والفن مش ضد بعض بالضرورة. لكن العلاقة دي محتاجة وعي من الفنان قبل أي حاجة. لازم يعرف هو بيستخدم المنصة ولا المنصة بتستخدمه.الفن اللي بيعيش مش الفن اللي اتشاف أكتر، الفن اللي بيعيش هو اللي فضل صادق.
