بقلم/منى فارس
مع اقتراب مسلسل The Boys من موسمه الأخير، الجمهور في حالة ترقب كبيرة، لكن في نفس الوقت في قلق متزايد من إن المسلسل ممكن يكرر نفس الأخطاء اللي وقع فيها Stranger Things في نهايته.
إيه المشكلة اللي اتكلم فيها Stranger Things؟
كتير من متابعي Stranger Things انتقدوا المواسم الأخيرة بسبب التركيز على قصص جانبية كتير ومبعثرة، والتأجيل المستمر للصراع الرئيسي لحد ما بيوصلوا للحلقات الأخيرة. والخوف دلوقتي إن The Boys ممكن يمشي في نفس الاتجاه، خصوصًا مع كثرة الشخصيات واتساع عالم المسلسل، ناهيك عن المشاريع الفرعية المرتبطة بيه.
إيه اللي قاله المنتج؟
المنتج التنفيذي إريك كريبك رد على المخاوف دي وقال إن اللحظات الهادئة وتطور الشخصيات مش عيب، ده جزء أصيل من هوية المسلسل. وأكد إن The Boys من الأول مش بس مسلسل أكشن ومعارك، لكنه دايمًا بنى نفسه على العلاقات الإنسانية والصراعات النفسية والسياسية.
وكمان أوضح إن الموسم الأخير مش هيمشي في الطريق التقليدي لنهايات أفلام الأبطال الخارقين، يعني متوقعوش معارك ضخمة ومؤثرات بصرية بس، لأن التركيز هيكون على المواجهات الشخصية والصراعات العاطفية بين الشخصيات الرئيسية.
إيه اللي الجمهور مستنيه؟
أكتر حاجة الجمهور متلهف عليها هي المواجهة المنتظرة بين بيلي بوتشر وهوملاندر، اللي بقت من أكتر الصراعات انتظارًا في عالم المسلسل كله
وبرغم إن في قطاع من الجمهور لسه قلقان من إن الموسم الأخير ممكن يتحول لمجرد تمهيد لمشاريع مستقبلية زي Vought Rising، إلا إن الرأي الأغلب بيقول إن المسلسل لسه عنده وقت كافي يقدم فيه نهاية قوية ومؤثرة، بشرط واحد بس: يركز على الشخصيات الأساسية ويغلق خطوطها الدرامية بشكل مُرضي.
