في خبر ما كانش حد متوقعه، أعلنت Universal Music Group إنها هتبيع نص حصتها في Spotify، اللي بتبلغ 3%، في صفقة ممكن توصل قيمتها لـ 1.4 مليار دولار. الخبر ده لوحده كفيل إنه يبقى حديث الساعة في عالم الموسيقى. بس المفاجأة الحقيقية مش في الأرقام، المفاجأة في إن الفنانين هيأخدوا نصيبهم من الأرباح دي. وده مش حصلش من فراغ، ده حصل عشان تايلور سويفت وقفت يوم وقالت “لأ”.
من البداية: إزاي الشركات الكبرى دخلت في Spotify أصلاً؟
الحكاية بدأت من زمان، لما Spotify كانت لسه بداياتها وكانت محتاجة إذن من شركات الموسيقى الكبرى عشان تشغّل الأغاني. الشركات وافقت، بس مش مجاناً أخدت حصص في المنصة نفسها. في الوقت ده، كتير من الناس شافوها مقامرة. اليوم، واضح إن الرهان كان صح.لما Spotify بدأت تتكلم عن الطرح العام، Warner وSony أعلنوا إنهم هيوزّعوا جزء من الأرباح على الفنانين من غير ما يكون في قانون يلزمهم بده. وبعدين Universal عملت نفس الكلام.
سوني وورنر: فرق مهم في التفاصيل
بس المشكلة إن “توزيع الأرباح” مش معناها نفس الحاجة عند كل شركة. Sony دفعت للفنانين بشكل مباشر، حتى لو الفنان عنده ديون للشركة. Warner اتعاملت بشكل تاني خصّت الديون الأول، وبعدين وزّعت اللي فضل. وده بالظبط اللي خلى موقف تايلور سويفت يبقى مختلف.
الشرط اللي غيّر كل حاجة
في 2018، لما سويفت كانت بتتفاوض للانضمام لـ Universal Music Group، رفضت توقّع من غير شرط واحد بالذات: إن أرباح أسهم Spotify تكون “غير قابلة للاسترداد” — يعني الفنانين ياخدوا حصتهم كاملة، مهما كانت ديونهم للشركة.وقالت عن الشرط ده إنه “يعني لي أكتر من أي نقطة تانية في العقد”. وشكرت المدير التنفيذي Lucian Grainge إنه وافق على شروط أكثر عدلاً للفنانين. الكلام ده مش مجرد تصريح ده موقف من فنانة عارفة كويس إن توقيعها بيساوي
تاريخ من المواجهة مع المنصات
مش أول مرة سويفت تقف الموقف ده. في 2015، بعتت رسالة مفتوحة لـ Apple على Tumblr طالبت فيها بدفع مستحقات الفنانين خلال فترة التجربة المجانية لـ Apple Music، وغيّرت Apple سياستها على طول. وقبل كده سحبت موسيقاها كاملة من Spotify احتجاجاً على ضعف العائدات، قبل ما تعيدها في 2017.
الفنانين هياخدوا قد إيه؟
لحد دلوقتي التفاصيل لسه مش واضحة لا حجم حصة الفنانين، ولا آلية التوزيع، ولا توقيت صرف المستحقات. بس المتوقع إن Universal هتعتمد نظام مشابه لتوزيع عائدات التسويات، بناءً على نسب حقوق الملكية والعوائد الرقمية. وفي أحسن السيناريوهات، ممكن أرباح كبار الفنانين توصل لملايين الدولارات.وختمت سويفت بكلام واضح: “أنا شايفة في ده علامة إننا ماشيين ناحية تغيير إيجابي لصالح المبدعين وده هدف مش هسيب السعي ليه.”
