بقلم / منى فارس
أكاديمية فنون وعلوم الصور المتحركة أعلنت عن حزمة تعديلات جوهرية على قواعد حفل الأوسكار الـ99، المقرر إقامته عام 2027، وأبرز التغييرات بتتعلق بـ3 محاور رئيسية: الذكاء الاصطناعي، وترشيحات الممثلين، وأهلية الأفلام الأجنبية.
أهم تغيير.. الممثل ينقدر يتنافس بأدائين في نفس الوقت
القاعدة الجديدة بتسمح للممثل إنه ياخد أكتر من ترشيح في نفس الفئة، بشرط إن أدائيه يكونوا من ضمن أعلى 5 أصوات. وده تغيير كبير لأنه بيوحّد قواعد التمثيل مع باقي فئات الجائزة اللي كانت بتسمح بده من زمان.
ليه التغيير ده مهم؟
الموضوع ده كان سبب أزمات كتير على مر السنين، لأن فرق الحملات الدعائية كانت بتلجأ لحيلة معروفة اسمها “تزوير الفئات”، يعني بيدفعوا الممثل ينافس في فئة الأدوار المساعدة بدل البطولة عشان ميتشتتش الأصوات عليه.
أشهر مثال على ده كيت وينسلت عام 2008، لما ترشحت لدور البطولة عن فيلم Revolutionary Road ودور مساعد عن The Reader في نفس الوقت، وفازت بجائزتي جولدن جلوب عنهم. لكن لما جه وقت الأوسكار، اتنقلت ترشيحتها فيThe Reader لفئة البطولة، وفي النهاية فازت بجائزة أفضل ممثلة.
من إمتى والقواعد دي موجودة؟
آخر مرة اتغيرت فيها قواعد التمثيل كانت في الأوسكار الـ17 عام 1945، لما الممثل باري فيتزجيرالد بقى الوحيد في تاريخ الجائزة اللي اتنافس بنفس الدور في فئتي البطولة والأدوار المساعدة في نفس الوقت. وبعدها بفترة قصيرة قررت الأكاديمية إن كل أداء ياخدش غير ترشيح واحد بس، والقاعدة دي فضلت على حالها لحد دلوقتي.
وإيه اللي اتغير في الذكاء الاصطناعي؟
الأكاديمية شددت كمان رقابتها على استخدام الذكاء الاصطناعي في الأفلام المرشحة، في خطوة بتعكس القلق المتزايد من تأثيره على صناعة السينما، وإزاي ممكن يأثر على معايير الأهلية للجوائز.
